Unuipanieu ICEM atusseu-tekanepissa

Katshishkutamatsheu-atusseu-tekanepiss

Traduction : Noëlla McKenzie

Uashat — Unuipaniepan ICEM katshishkutamatsheu-atusseu-tekanepissa ka ishinikatakanit TAM kie ka issishuemakak : {tshitapatamu, aimu, mashinaitsheu} : nana utat minashtakannua ka mamuituht Kaianuet,

21 takuatshi-pishimua anite Shaputuan Uashat.

Ka atusseshtak katshishkutamatsheu-aimunnu, Doris Vollant, uitamupan ne tekanepiss ka tutuakanit tshika apatishu anite innu-katshishkutamatsheutshuapit. Atusseu-mashinaikan tshika takuan ashit ne tekanepiss.

Kie anite tekanepissit, mitshetuait itueuat anitshenat nekamuht kie eimiht tshetshi petahk auassat tatipan aitueunanut anite kutaka innu-assia; eukuan ishi-naushunamupan Kaianuet, miam ka issishuet Doris Vollant.

Kutak atusseun tshe unuipanitakanit

Tshika shaputuepanu atusseun tshe ui tshishtapanitakanit isssishuepan Doris Vollant . Ne ushkat mashinaikan uenuipanit ishpishau atusseun ushkau-pishimua ut nuash tshishe-pishimua. Kie ne atusseu-mashinaikan patetat-tatunnuemakan. Minuat kutak ekue takuaki tshishe-pishimua ut nuash uapikun-pishimua, issishueu.

Nikan ka takuaitshet, Rachel Malek, uitamupan eshi-nashamaniti ICEM e ashu-patshitinakanit mak e uauitshiakanit innu-katshishkutamatsheht anite innu-aitunit kie innu-aimunit. Kie iapit ne atusseun tshika uitshikuat anitshenat innu-auassat anite e tshishkutamatishuht mak tshetshi aiat pikutaht utaimunuau. Eukuan ishi-nashamupanat anitshenat kainnu-tshishkutamatsheht mak tshishennuat ka taht anite Kaianuet ka ishinikatakanit tshetshi unuipaniakanit ue ushkat uapanitshakuman-tekanep.